Is ionad Gaeilge, ealaíon agus cultúir í Cultúrlann McAdam Ó Fiaich atá lonnaithe i gcroílár na Ceathrún Gaeltachta ar Bhóthar na bhFál, Béal Feirste, i bhfoirgneamh ársa álainn a tógadh sa bhliain 1896. Bunaíodh an Chultúrlann beagnach 30 bliain ó shin agus tá muid ar thús cadhnaíochta i dtaobh athbheochan na Gaeilge sa chathair ó shin. Agus breis is 100,000 cuairteoir againn le linn 2019, is cúis mhór bhróid dúinn gur féidir saol iomlán trí Ghaeilge a bheith ag duine faoi scáth na Cultúrlainne.
Tá bród agus lúcháir as cuimse ar fhoireann agus ar bhord Chultúrlann McAdam Ó Fiaich inniu gur fógraíodh mar phríomhbhuaiteoir Chomórtas Ghlór na nGael 2019 muid.
‘Ón osna is troime a thig an ceol is binne’ de réir an tseanfhocail agus cé go bhfuil ábhair bhuairimh agus imní orainn ar fad san am dúshlánach seo is tógáil croí agus meanman é an borradh cruthaitheachta atá le sonrú sa phobal i gcoitinne, ach go háirithe i measc ár gceoltóirí agus ár n-ealaíontóirí. Anseo i gCultúrlann McAdam Ó Fiaich, cé go bhfuil na doirsí dúnta, tá muid tiomanta don chuid is fearr den cheol, den chultúir agus d’ealaín na tíre a chur ar fáil daoibh.
